دانلود آهنگ جدید

متن آهنگ بهیگ از مسعود بختیاری

وریستین وریستین اوردن بهیگه

به سر چادر اسپید و افتو و تیگه

ددوم درگله جم بکن دور چاله

بکش پیش پاس گو تو نرمیشه کاله

ز آستاره ها گل بریزین به شونس

بدین مه و افتو نه سی ریگوشونس

ددوم رو بکن چالنه پر ز انگشت

بریزین به چاله مله گرگ ودینشت

بگوین میشکاله بکش ساز کرنا

جغلیل سی بازی وریستانه وا پا

بزن ترکه بازی به چوپی و سرناز

وری میشکال دی بکن هوف منه ساز

بوازین و توشمال برین وا نیا سون

برین خرسکانه ونین زیر پاسون

بهیگه برین در بدین دور تش کر

بریزین به تش زاگ اسپید و کندر

وریستین اوردن بهیگه سواره

ز آستاره میل پا و دستینه داره

سی نفتس یه خالک ز افتو بیارین

سی گوشواره هاس مه نه از ره درارین

نها تش و که برچه برچه جهازس

بدین هر چه خواستن ولا ایبرازس

جهاز برین و بچینین سر چل

بخونین دوالالی و هی گل ای گل

دوانه بگوین رخته نو نه به ور کن

وری زی تری گو دی مال خور کن

بزن میشکال تا که مردم جمابون

دهل کو بکو گوش شیطون کر کن

بوازین سه پا و بگردین و چوپی

دهل کو بکو چوبه سرناز و کرکی

بگوین هی گل هی گل سی بخت سفیدس

بریزین نمک پره چشم حسیدس